Një dopietë e sulmuesit, Caleb Ekuban i mjaftoi Partizanit për të mundur Laçin në transfertë. Starova debuton me fitore në krye të stolit të kuq pas largimit të Adolfo Sormanit, ndërsa kurbinasit që nuk arrijnë të reagojnë pozitivisht edhe pa Troisin, që u zëvendësua nga trajneri Ndreu.
Të kuqtë e nisën ndeshjen në sulm duke vënë në vështirësi portën kundërshtare. Torrasa pretendoi për 11-metërsh në minutën e 9-të, por nuk ishte i të njëjtit mendim gjyqtari. Në të 33-ën Batha i vetëm pranë zonës së portierit nuk u koordinua mirë në goditjen me kokë, ndërsa në fund të pjesës së parë Laçi fiton hapësira.
Goli që zhbllokoi rezultatin do të vinte pas një sulmi të shpejtë me protagonistë Ekuban dhe Torrasa. Argjentinasi pasoi saktë për ganezin, i cili shmangu edhe Selmanin, duke e dërguar topin në rrjetë. Në minutën e 64-t pas një goditjeje këndi i lënë krejtësisht i vetëm, sulmuesi i lindur në Itali shënoi edhe golin e dytë. Për t’u theksuar edhe debutimi sezonal në minutën e 87-të të Mentor Mazrekajt, i cili u prit me duartrokitje nga tifozët e kuq.
I pafat Faton Toski në minutat shtesë, me topin së stampohet në traversë. Pak sekonda më pas Jemini vërshëlleu për përfundimin e ndeshjes, me Partizanit që rikthehet në vendin e dytë, ndërsa Laçi mbetet i parafundit me vetëm tri pikë.
