Teksa luftimet vijojne në Sudan, Organizata Botërore e Shëndetësisë ka paralajmëruar për “një rrezik të madh biologjik”, pasi luftëtarët sudanezë morën nën kontrroll Laboratorin e Shëndetit Publik në kryeqytetin Khartoum.
Mediat e huaja raportojnë se laboratori, në të cilin ndodhen kampione të sëmundjeve të ndryshme dhe materiale të tjera gjenetike, është marrë nga formacionet paraushtarake të Forcave të Mbështetjes së Shpejtë.
Nima Saeed Abid, përfaqësuesja e OBSH-së në Sudan, e përshkroi ngjarjen si “ekstremisht të rrezikshme” pasi në atë laborator ka edhe kampionë të poliomielitit dhe kolerës.
Në një deklaratë për CNN, OBSH-ja tha se teknikët e trajnuar të laboratorit nuk kanë më akses” dhe se objekti kishte pësuar ndërprerje të energjisë. Kjo do të thotë se laboratori nuk ka më kushtet e duhura për t’i mbajtur siç duhet materialet biologjike.
“Duhet një ndërhyrje urgjente ndërkombëtare për të rikthyer elektricitetin dhe për ta siguruar laboratorin nga çdo formë përplasjeje, pasi po përballemi me një kërcënim të vërtetë biologjik”.
Numri i njerëzve të vrarë në Sudan që nga nisja e përplasjeve 11 ditë më parë ka shkuar në të paktën 459, sipas shifrave të OBSH-së. Ndërsa, 4072 persona kanë mbetur të plagosur.
