Në disa vende të Amerikës Qëndrore është shpallur gjendja e emergjencës nga stuhia tropikale Nate e cila ka lënë të paktën 22 viktima në Kosta Rika, Nikaragua dhe Honduras dhe më shumë se 20 persona janë shpallur të humbur.
Stuhia ka shkaktuar shira të mëdha, rrëshqitje të dheut dhe përmbytje që po bllokojnë rrugët, duke shkatërruar urat dhe shtëpitë dhe tashmë i është drejtuar brigjeve jugore të SHBA-ve.
Komisioni Kombëtar i Emergjencave bëri me dije se në Kosta Rika, gati 400,000 njerëz janë pa ujë të rrjedhshëm, të gjitha udhëtimet në tren u pezulluan dhe dhjetëra fluturime u anuluan të enjten.
Sipas Qendrës Kombëtare të Uraganit, stuhia Nate do të fitojë forcë dhe do të drejtohet të dielën në bregun jugor të Shteteve të Bashkuara.
Banorët nga Florida në Teksas janë paralajmëruar të përgatiten për stuhinë, e cila mund të jetë stuhia e tretë më e madhe që ka goditur bregun jugor Brenda një viti.
Kompanitë e naftës që operojnë në Gjirin e Meksikës thonë se po evakuojnë stafin nga platformat që shtrihen përgjatë rrugës së parashikuar të stuhisë.
