Studimi: Drita e natës “ngarkon” zemrën, si ndikon në funksionimin e saj
Ekspozimi ndaj dritës gjatë natës mund të lidhet me ndryshime të rëndësishme në strukturën dhe funksionin e zemrës, sipas një studimi të publikuar në revistën shkencore European Heart Journal. Studimi u drejtua nga Universiteti Tulane në SHBA dhe përfshiu 11,071 persona nga databaza britanike UK Biobank.
Pjesëmarrësit mbajtën për shtatë ditë një sensor drite në kyçin e dorës, ndërsa rreth tre vjet më vonë iu nënshtruan rezonancës magnetike të zemrës. Studiuesit krahasuan personat e ekspozuar ndaj më shumë se 3 lux dritë gjatë natës me ata që ishin të ekspozuar ndaj shumë pak ose aspak drite.
Rezultatet treguan se personat që ekspozoheshin ndaj më shumë dritës gjatë natës kishin trashje të murit të barkushes së majtë, duke reduktuar hapësirën brenda saj. U vunë re gjithashtu shenja të një aftësie më të ulët të muskulit të zemrës për t’u relaksuar dhe ndryshime në barkushen e djathtë dhe atriumin e majtë.
Sipas studiuesve, këto ndryshime mund të lidhen me atë që njihet si “rimodelim i zemrës”, një proces që mund të shfaqet si përgjigje ndaj stresit të vazhdueshëm të zemrës. Ekspertët sugjerojnë masa të thjeshta për reduktimin e dritës gjatë natës, si përdorimi i perdeve të errësimit, ndriçimi me tone të ngrohta dhe mbulimi i dritave LED të pajisjeve elektronike.
Megjithatë, autorët theksojnë se studimi ka kufizime të rëndësishme. Ai mati vetëm intensitetin e dritës dhe jo ngjyrën e saj, ekspozimi u regjistrua vetëm për një javë dhe pjesëmarrësit ishin kryesisht të bardhë dhe më të shëndetshëm se mesatarja. Për më tepër, bëhet fjalë për një studim vëzhgues, ndaj rezultatet tregojnë një lidhje mes dritës së natës dhe ndryshimeve në zemër, por nuk provojnë se drita është shkaku i drejtpërdrejtë i tyre.
/vizionplus.tv
