Për të dytën ditë radhazi, ish-ministri i Shëndetësisë, Ilir Beqaj është paraqitur në Kuvend me pranga në duar dhe i shoqëruar nga efektivët e policisë. Në pamundësi për të dëshmuar ditën e djeshme në Komisionin Hetimor Parlamentar për Sterilizimin dhe Check-Up ashtu siç ishte parashikuar, Beqaj është paraqitur sërish sot para opozitës dhe mazhorancës për të dhënë sqarimet e tij lidhur me rolin e tij si ministër Shëndetësie në kohën kur u firmosën dy kontratat koncesionare.
Ditën e djeshme mbledhja e Komisionit u shoqërua me debate të ashpra mes opozitës dhe mashorancës. Debatet nisën pasi opozita kërkoi shtyrjen e afatit të Komisionit, të cilit i përfundon mandati nesër, të enjten, ndërsa mazhoranca kundërshtoi.
Më pas, ish-ministri Beqaj, kërkoi që të bënte prezantimin në Power Point, kërkesë e cila u refuzua nga opozita.
Nga ana tjetër, mazhoranca socialiste kërkoi nga kryetarja opozitare e komisionit, Albana Vokshi, që kërkesa e Beqajt të hidhej në votim. Por Vokshi nuk pranonte duke thënë se nuk mund të hedhë në votim një kërkesë të pabazuar në ligj.
Debatet mes palëve për këtë pikë zgjatën disa orë, duke bërë që mbledhja të përfundonte pa deklaratën apo dëshminë e Ilir Beqajt.
Ilir Beqaj u paraqit në komisionin parlamentar i prangosur dhe i shoqëruar me polici, për shkak se ka masë sigurimi arrest në burg për abuzim me fondet e BE kur drejtonte SASPAC. Ndërkohë që për sterilizimin në shëndetësi, që gjithashtu po hetohet nga Prokuroria e Posaçme, Beqaj ka masën detyrim paraqitje./vizionplus.tv
