Ministrja për Evropën dhe punët e Jashtme, Elisa Spiropali është takuar me Kryetarin e Kuvendit të Republikës së Maqedonisë së Veriut, Afrim Gashin.
Me anë të një postimi në rrjetet sociale, Spiropali tregon se biseduan për rëndësinë e angazhimit të të gjitha forcave politike të përfaqësuara në Kuvend për mbështetjen e reformave, forcimin e dialogut politik dhe përshpejtimin e procesit të integrimit europian.
Spiropali nënvizon se bashkëpunimi parlamentar mbetet një shtyllë e rëndësishme mes Shqipërisë dhe Maqedonisë së Veriut, për vizionin e përbashkët europian.
Postimi i Ministres Spiropali:
Me Kryetarin e Kuvendit të Republikës së Maqedonisë së Veriut, Afrim Gashi, në një bisedë të hapur dhe konstruktive mbi rolin kyç të Kuvendit dhe diplomacisë parlamentare në avancimin e marrëdhënieve dypalëshe.
U theksua rëndësia e angazhimit të të gjitha forcave politike të përfaqësuara në Kuvend për mbështetjen e reformave, forcimin e dialogut politik dhe përshpejtimin e procesit të integrimit europian.
Shqipëria dhe Maqedonia e Veriut ndajnë të njëjtin horizont europian, dhe bashkëpunimi parlamentar mbetet një shtyllë e rëndësishme për ta çuar këtë proces përpara me konsensus, përgjegjësi dhe vizion të përbashkët.
/vizionplus.tv
