Një thirrje për paqe e shpëtim që fton njerëzit të lenë pas mëritë e të lehtësojnë zemrën nga pesha e së keqes.
Pas lindjes së diellit, besimtarët myslimanë kurorëzuan një muaj agjërimi dhe adhurimesh me namazin e Fiter Bajramit.
Lexo edhe :
Related Posts
Kjo praktikë fetare, edhe këtë vit u krye në sheshin Skënderbej, nga ku u drejtuan lutje për falje dhe mëshirë e begati.
“Ky bajram qoftë i pranuar në të gjitha zemrat karshi Allahut. Sa ditë të bukura që kemi kaluar, nuk mund ti imagjinojmë dot. Të mira paçin në çdo familje, i gjithë njerëzimi”, tha një besimtar.
“Bajrami është një lumturi shumë e madhe që vetëm agjëruesi mund ta kuptojë”, u shpreh një tjetër.
“Unë kam 50 vjet që nuk e kam lënë asnjë ditë. Agjërimi është një gëzim shumë i madh. Bajramin e feston zemra”, tha një besimtar.
Kryetari i Komunitetit Mysliman të Shqipërisë, Bujar Spahiu nënvizoi se urtësia e agjërimit, namazit dhe adhurimeve të tjera, qëndron tek qëllimi për të përmirësuar karakterin moral dhe shpirtëror. Vazhdimësia e punëve të mira është një nevojë për shoqërinë.
“Ky bajram është një festë pas një maratone shpirtërore. Ne agjëruam 30 ditë për Krijuesin e gjithësisë i cili na urdhëroi të agjërojmë me vullnetin tonë të lirë. Dhe sot kemi të drejtën e plotë për të festuar me të gjithë njerëzit”, u shpreh Spahiu.
Festa e Bajramit mbledh bashkë të njohur e të panjohur, të dashurit e zemrës, familjarë dhe miq, për të ndarë së bashku gëzimin e kësaj dite.
“Ju uroj të gjithëve, gëzuar Bajramin. Gëzuar Bajramin të gjithë myslimanëve kudo që janë”, uron një fëmijë i vogël. /vizionplus.tv