Shqipëria luan sonte një prej ndeshjeve më të rëndësishme në historinë e saj të kualifikuesve në kupën e botës. Gjysmëfinalja ndaj Polonisë në Varshavë është një ndeshje tek e cila nëse kalohet me sukses do të çonte në finalen, gjithashtu në një ndeshje të vetme pas disa ditësh me fituesen e çiftit Ukrainë-Suedi, për të luajtur shanset e realizimit të ëndrrës për kualifikim në kupën e botës. Një ëndërr që e ka lënë pa gjumë trajnerin Silvinjo prej muajsh, sikurse ai u kujdes vetë të evidente në konferencën e fundit për shtyp nga Varshava.
“Polonia është një skuadër që shfrytëzon shumë tranzicionin, me lojtarë të shpejtë që mbajnë topin dhe pastaj e punojnë mirë. E vërtetë, nuk janë një skuadër që ka karakteristikë mbajtjen e topit, por në kundërsulm të vret, ka shumë lojtarë të mirë. Urban ka bërë 5 ndeshje si trajner, shihet skuadra shumë më e organizuar, si në aspektin ofensiv, ashtu edhe mbrojtës. Por edhe jemi rritur shumë, kemi lojtarë që mund të luajnë si sulmues krahu dhe në qendër. Jam mirë, nuk fle prej kohësh, por jam mirë. Kjo është puna e kombëtares”, tha Sylvinho.
Ndërsa kapiten Gjimshiti si gjithmonë shmang euforinë, premton luftë sportive, por thotë se shanset në fushë janë 50 me 50.
“Besoj se shanset kur të hysh në fushë janë 50 me 50. Unë hy në fushë për fitore, besoj se gjithë kombëtarja. Risia ka qenë e mirë dhe madhe. Kemi marrë eksperiencë në ndeshjet e fundit, do na ndihmojë dhe nesër. Taktikën e vendos trajneri. Si të sulmojmë dhe mbrojmë, të dyja duhet të jenë perfekte pothuajse për të fituar me një kombëtare perfekte si Polonia”, tha Gjimshiti.
Në seancën e fundit stërvitore të zhvilluar në stadiumin e ndeshjes “PGE Arena” në Varshavë, nuk pati surpriza negative për kuqezinjtë. Alarmi i një shqetësimi fizik për Hysajn ka kaluar shpejt dhe mbrojtësi i Lacios do të jetë gati. Sylvinho vendosi të çojë në tribune Nazmi Gripshin, Jasir Asanin dhe Klisman Caken. Ndërsa sa i takon formacionit nuk do të ketë shumë ndryshime në kualifikueset. Nisur nga mungesat e Manajt dhe Dakut në sulm do të jenë me gjasë Hoxha, Uzuni dhe Bajrami, ndërsa në mesfushë ka balotazh mes Laçit dhe Ramadanit. Në mbrojtje Ajeti i avantazhuar para Ismajlit për pozicionin në krah të Gjimshitit. Ndeshja do të gjykohet nga anglezi Anthony Taylor.
