Ambasadorja e SHBA-ve në Tiranë, Yuri Kim i është kundërpërgjigjur kryeministrit Edi Rama, pas deklaratës që ky i fundit bëri ditën e djeshme mbi pastërtinë e figurës së kandidatëve për deputetë në zgjedhjet e 25 prillit.
Kryediplomatja tha se pastrimi i listave të kandidatëve nuk duhet bërë sepse kështu thonë ambasadorët, por sepse politikanët e kanë detyrë zbatimin e ligjit shqiptar, në respekt të votuesve.
“Drejtuesit e partive nuk duhet të pastrojnë listat e tyre thjesht sepse disa ambasadorë thonë kështu ose sepse SHBA e kanë bërë të qartë se lufta ndaj korrupsionit është prioritet. Ata duhet ta bëjnë këtë sepse kërkohet nga ligji shqiptar, është ajo që pritet nga një vend aleat i NATO-s dhe aspirant i BE-së, dhe kjo është një shenjë themelore e respektit për votuesit”, shkruan ambasadorja Yuri Kim, raporton Vizion Plus.
Kryeministri Edi Rama theksoi në konferencën e djeshme se kandidatët për deputetë që gënjejnë për të kaluarën e tyre mbajnë përgjegjësi individuale dhe se asnjë ambasador “nuk ka nevojë që t’i tregojë detyrën”.
