Situata në Qarkun e Korçës paraqitet e qëndrueshme dhe nën monitorim të vazhdueshëm nga strukturat përgjegjëse, ndërsa gjatë natës nuk janë raportuar problematika të reja në territor.
Megjithatë, ndërhyrjet vijojnë në disa zona të prekura nga reshjet dhe moti i keq. Po punohet për forcimin e argjinaturës së lumit Devoll, si dhe për pastrimin e dherave në rrugën e fshatit Mesmal, ku janë evidentuar problematika në qarkullim.
Punime janë në proces edhe në rrugën e fshatit Dunicë, ndërkohë që është siguruar një mjet me zinxhirë për hapjen e rrugës drejt pesë fshatrave të Njësisë Administrative Dardhas, të cilat kanë mbetur të bllokuara. Paralelisht, grupet e konstatimit dhe vlerësimit vijojnë punën për evidentimin e dëmeve të shkaktuara.
Në aspektin rrugor, të gjitha akset janë të hapura, por vijon monitorimi dhe kriposja e segmenteve më problematike. Në aksin Qafë Plloçë–Qukës, qarkullimi është i mbyllur përkohësisht, për shkak të punimeve për pastrimin e masivit të inerteve nga trupi i rrugës.
Problematika të kufizuara raportohen edhe në furnizimin me energji elektrike, ku 16 abonentë ruralë në zonat Krushovë dhe Prenisht vijojnë të jenë pjesërisht pa energji, ndërsa furnizimi për konsumatorët e rëndësisë së veçantë funksionon normalisht.
Ndërkohë, nga Hydropower Devoll bëhet me dije se pritet mbyllja e përkohshme e shkarkimeve nga diga e Moglicës, me situatën që do të monitorohet në mënyrë të vazhdueshme.
Strukturat përgjegjëse mbeten në gatishmëri dhe në koordinim të plotë, ndërsa qytetarët do të informohen për çdo zhvillim të ri./vizionplus.tv
