Rruga Milot-Balldren, një ndër koncesionet më të kushtueshme të miratuara nga qeveria fillimisht ishte projektuar të ndërtohej si një Byppas në Lezhë.
Nga raporti I monitorimit të publikuar nga Ministria e Infrastrukturës ishte parashikuar që ky Byppas me gjatësi 4 km do të kushtonte 24,6 milion euro, ose e thënë ndryshe 6.1 milion euro për kilometër.
Në kuadër edhe të investimeve për Ballkanin Perëndimor ishin akorduar 350 mijë euro për vlerësimin e ndikimit në mjedis si dhe për studimin paraprak të fizibilitetit.
Raporti evidenton se edhe për rrugën Thumanë –Kashar me një gjatësi prej 20.4 km kostoja totale llogaritej në 169.3 milion euro ose 8.2 milion euro për kilometër.
Por të dy këto projekte u ripanë nga qeveria duke rritur disa herë kostot e tyre si dhe duke u shoqëruar me një debat të madh publik lidhur me transparencën që shoqëroi miratimin.
Për projektin Thumanë-Kashar qeveria u tërhoq, pas publikimit të skandalit të Unazës së Madhe të Tiranës. Pas firmës DH Albania që fitoi me dokumente të falsifikuara, Zëri i Amerikës denoncoi se fshihej kompania Gener 2 e cila ishte miratuar nga ministria si kompania që do të ndërtonte rrugën Thumanë-Kashar.
Sa I përket rrugës Milot –Balldren shpenzimet totale të saj arrijnë në 300 milion euro, por kjo kontratë u kthye për rishqyrtim nga presidenti I republikës për mungesë transparence dhe si dhe kosto të ekzagjëruara që rëndojnë buxhetin e shtetit për vitet në vijim.
Tashmë kjo kontratë me nisjen e sesionit të ri do të kalojë sërish për diskutim në parlament.
