Pesë muaj pas zgjedhjeve parlamentare, ODIHR publikoi raportin përfundimtar për procesin e 11 majit.
Gazetarja Danjela Maloku, e ftuar në studion e Quo Vadis në Vizion Plus, tha se në raport është nënvizuar gjuha kritike midis dy liderëve.
Sipas gazetares, Berishës iu deshën vetëm pak minuta për ta lexuar raportin dhe për ta vlerësuar si një konfirmim të shqetësimeve të ngritura nga Partia Demokratike gjatë fushatës, në ditën e zgjedhjeve, si edhe pas zgjedhjeve.
Pjesë nga biseda:
Borakaj: Në selinë blu janë të kënaqur me raportin e OSBE/ODIHR?
Maloku: Berisha, të paktën ai që ka peshën kryesore të reagimit në selinë e Partisë Demokratike, iu deshën shumë pak minuta për ta lexuar dhe për të patur një mendim mbi raportin e OSBE/ODIHR-it. Ai në fakt e shpalli si një fitore të opozitës. Dhe unë këtu jam dakord me disa qëndrime të Partisë Demokratike, ose edhe të opozitës. Sepse raporti adreson disa prej shqetësimeve që Partia Demokratike i ka shprehur vazhdimisht, qoftë gjatë fushatës elektorale, qoftë gjatë zgjedhjeve, ose edhe pas tyre kur doli rezultati. Partia Demokratike dhe opozita ngrinin me forcë disa argumente përse humbi zgjedhjet. Këto shqetësime përfshinin përdorimi i administratës zgjedhore, që gjithsesi në raportin e OSBE-së përmendet fort, të paktën në këndvështrimin tim. Çështja e patronazhistëve, që po ashtu përmendet në raport. Gjuha e polarizuar, shpesh shumë kritike në drejtim të njëri-tjetrit, të dy liderëve kryesorë që u përfshinë në garën elektorale. Këto janë evidentuar dhe janë parë si shqetësuese edhe nga vëzhguesit e OSBE/ODIHR-it. Qoftë nga Rama, që “bufin e Kënetës” e përmendte në çdo takim të tij elektoral, por qoftë edhe epitetet që ka vendosur zoti Berisha në drejtim të kundërshtarit të tij politik. Pra, të gjitha këto evidentime që ka pasur raporti, një pjesë e tyre kanë adresuar edhe shqetësimet e opozitës. Dhe kjo e fundit e ka “tundur” si një fitore të saj, në kushtet kur kërkonte me ngulm daljen dhe publikimin e raportit.
/vizionplus.tv
