Ka ndërruar jetë në moshën 95 vjeçare presidenti legjendar dhe ikona e pavarësisë që qeverisi mbi tre dekada Zimbabvet.
Robert Mugabe, ishte shtruar në spital që në muajin prill në Singapor.
I lindur më 21 shkurt të vitit 1924, Mugabe spikati për idetë e tij revolucionare, dhe në vitin 1964 u dënua me burg pa gjyq për më shumë se një dekadë pasi kritikoi qeverinë e Rodezisë, një koloni britanike e drejtuar nga pakica e bardhë.
Në vitin 1973 ndërsa ishte ende në burg, Mugabe u zgjodh si president I Bashkimit Kombëtar Afrikan të Zimbabve. Pas lirimit, ai drejtoi disa nga bastisjet guerile në Rodezi, duke I dhënë fund krizës në Republikën e re të pavarur të Zimbabves.
7 vjet më vonë, ai siguroi një fitore dërrmuese në zgjedhjet e para që u mbajtën në këtë republikë në vitin 1980, duke u bërë kështu presidenti i parë i Zimbabves, post të cilin e mbajti për 3 dekada me radhë deri në vitin 2017.
Gjatë kohës në pushtet, kritikët e akuzuan Robert Mugaben si një diktator. Ai u përball me kundërshtar serioz politik dhe u detyrua të përdorë edhe policinë për të ushtruar dhunë ndaj rivalëve, pasi humbi raundin e parë të zgjedhjeve presidenciale.
Mugabe më pas deklaroi se vetëm Zoti mund ta largonte nga detyra.
Por disfata e parë ndodhi vetëm në vitin 2009, kur në mes të një kolapsi ekonomik ai emëroi rivalin e tij në postin e kryeministrit.
Pas 37 vitesh në pushtet Robert Mugabe dha dorëheqjen, ndërsa vendi ndodhej në mesin e një krize të paprecedent dhe protestave të vazhdueshme.
Megjithatë Robert Mugabe u vlerësua për zgjerimin e aksesit në shëndetësi dhe arsimim për shumicën e njerëzve me ngjyrë.
Pasardhësi i tij, Emmerson Mnangagwa, shprehu “trishtimin” e tij, dhe e quajti ish presidentin “ikonën e çlirimit të vendit”.
