Spanja duket se po kalon një trazirë të vërtetë në futboll. Shtypi i së martës u hap me deklarata dhe kundërdeklarata si nga Barcelona ashtu edhe nga Reali i Madridit ku ankesat kanë qenë të shumta ditëve të fundit. Sport e hapi faqen e parë me titullin “Plas gjuetija e shtrigave kundër Piques, komuniteti i arbirtrave kërkon pezullimin e qendërmbrojtësit katalan për shkak të postimeve të tij në twitter”. Pique pati thumbuar gjyqtarin e takimit Villarrea-Real Madrid, duke supozuar rreth një mbajtje me hatër të Los Blancos që atë ndeshje e fituan 2-3 me përmbysje. Por në shtëpinë e Realit nuk e mendojnë kështu, përkundrazi. AS raportoi të martën se madrilenët janë kundër kompanisë televizive Movistar të kontraktuar nga La Liga, pasi sipas tyre nuk shfaqën në transmetim pamjet ku Bakambu i Villarrealit shënonte golin e dytë në pozicion jashtë-loje. I njëjti qëndrim gjente hapësira edhe te Marca. Ndërkohë në Angli faqet e para i zuri Jamie Vardy dhe Leicester City që mundën 3-1 Liverpoolin, por ndërkohë Daily Mirror raportoi se te Arsenali, Wenger ka refuzuar një ofertë kineze që mund ta paguante atë 30 milionë paundë në sezon. Edhe The Sun hapej me Vardy-in në faqen e parë, ndërsa një vëmendje i kushtohej edhe cështjes kontraktuale të Ibras te United. Nga Chelsea Daily Express nxorri se për Diego Costan ka pasur një ofertë të refuzuar prej 90 milionë paundësh nga Kina. Ndërsa në Itali spekulimet rrethojnë të ardhmen e trajnerit të Interit Stefano Pioli. Gazzetta dello Sport shkroi se në vend të tij po shqyrtohen Conte dhe Simeone, ndërsa në merkato kërkohet me patjetër një mbrojtës.
Shtypi sportiv, Barca dhe Real vazhdojnë të ankohen, Wenger refuzoi Kinën
