Të tjera detaje kanë dalë në dritë nga sulmi në Las Vegas, ku humbën jetën 58 persona dhe mbi 550 të tjerë mbetën të plagosur. Autoritetet bëjnë me dije se Stephen Paddock, mund ta ketë planifikuar më herët sulmin tragjik. Ai kishte vendosur kamera sigurie në suitën e tij të hotelit në katin e 32. Dy kamerat në korridor i lejonin të shikonte nëse po afrohej ndonjë roje sigurie apo polic.
Disa ditë përpara sulmit, 64-vjeçari kishte përzgjedhur dhomën që shihte për nga sheshi i koncertit. Ai kishte dërguar pa rënë në sy një arsenal të vërtetë armësh, ndërsa në makinë iu gjetën mijëra fishekë. Sherif i Las Vegasit ka thënë për mediat se Paddock kishte menduar per gjithçka me kujdes, e këtë e vërteton edhe lloji i armëve të përdorura.
Per te zbuluar motivin e masakrës, hetuesit janë drejtuar edhe tek e dashura e tij, Marilu Danlej, e cila ka mbërritur tashmë në SHBA. Ajo pritet të merret në pyetje nga agjentë federalë. 3 ditë më para sulmit Padok i kishte dërguar asaj rreth 100 mijë dollarë në Filipine.
