Liqeni i Ulzës ka marrë një pamje shkretëtire edhe pse jemi në mesin e muajit Mars. Si kurrë më parë niveli i këtij liqeni nuk ka qenë kaq i ulët.
Një situatë e tillë për banorët që jetojnë përreth liqenit të Ulzës ndodh shumë rrallë. Edhe pse tashmë kemi kaluar stinën e dimrit, sipërfaqja e mbushur me ujë e liqenit të Ulzës është shumë e vogël, e krahasueshme me situatën që krijohet gjatë muajve të verës.
Specialistët e mjedisit thonë se mungesa e gjatë e reshjeve të nevojshme për mbushjen e sipërfaqes së liqenit, ka sjellë këtë pasojë.
Ata shprehen se kjo do të ndikojë edhe për bimësinë përreth e cila nuk do të ketë lagështinë e nevojshme për tu zhvilluar. Një ndikim negativ pritet të ketë edhe tek gjallesat ujore, sidomos në shtimin natyral të peshkut.
Pamja që të ofrohet sipër fshatit Ndrelalaj, është me dy tablo, nga njëra anë drejt Ulzës duket një pjesë e liqenit të mbushur me ujë dhe nga ana tjetër drejt Urakës apo fshatit Rrethe Baz që duket si shkretëtirë.
Në mungesë të ujit për një kohë të gjatë, hapsira boshe po pushtohet nga bimësia.
