Shtëpia e Bardhë njofton marrëveshjen Ukrainë-Rusi për armëpushim në Oleski, mijëra civilë pritet të evakuohen
Ukraina dhe Rusia kanë rënë dakord për një armëpushim të përkohshëm në qytetin Oleski, në rajonin e Hersonit, duke nisur nga 29 tetori, me qëllim lejimin e dërgimit të ndihmave humanitare dhe evakuimin e civilëve përmes një korridori të sigurt. Lajmi është bërë i ditur nga Shtëpia e Bardhë, e cila njoftoi se marrëveshja parashikon pezullimin e përkohshëm të veprimeve ushtarake në zonë.
Sipas deklaratës amerikane, banorët do të kenë mundësinë të zgjedhin nëse dëshirojnë të zhvendosen në territore të kontrolluara nga Ukraina apo në zona nën kontrollin rus. Për largimin e tyre do të vihen në dispozicion mjete transporti dhe ndihma e nevojshme, ndërsa korridori humanitar synon të garantojë kalim të sigurt për civilët dhe furnizimet.
Oleski ndodhet nën kontrollin rus që prej vitit 2022, pas nisjes së pushtimit rus të Ukrainës. Qyteti u godit rëndë nga shkatërrimi i digës hidroelektrike të Kahovkës në vitin 2023, që shkaktoi përmbytje të mëdha dhe dëme të konsiderueshme në infrastrukturë. Gjatë muajve të fundit, situata është përkeqësuar për shkak të izolimit, mungesës së ushqimeve dhe ilaçeve, ndërprerjeve të energjisë elektrike dhe qasjes së kufizuar në shërbimet shëndetësore.
Sipas vlerësimeve, rreth 6 mijë civilë mund të ndodhen ende në Oleski dhe zonat përreth, mes tyre deri në 200 fëmijë. Sulmet e vazhdueshme me dronë e kanë bërë të rrezikshëm largimin nga zona, ndërsa armëpushimi synon të krijojë kushtet për mbërritjen e ndihmave dhe evakuimin e personave që dëshirojnë të largohen.
/vizionplus.tv
