Greqia duket e gjunjëzuar nga cikloni “Janos”. Qindra-mijëra banorë bëjnë thirrje për ndihmë, për të hequr ujin nga shtëpitë e bizneset e tyre dhe për t’u rikthyer në normalitet. Uji u shndërrua në baltë, përmbyti dyqane e banesa, ndërsa shtëpitë u rrënuan.
Në komunën e Mouzaki, imazhi i ndërtesës së shkatërruar të qendrës shëndetësore tregon ashpërsinë dhe intensitetin e motit të keq, ndërsa fatkeqësitë në infrastrukturë në përgjithësi janë të mëdha dhe të pallogaritshme. Zëvendës Ministri i Mbrojtjes Civile dhe Menaxhimit të Krizave, Nikos Hardalias, ishte në Kefalonia, ku kontrolloi dëmet e lëna pas nga cikloni.
“Është koha për një punë shumë të vështirë dhe me pak fjalë. Duhet të nisim restaurimin e menjëhershëm dhe kthimin në normalitet për ishujt Kefalonia dhe Ithaca. Po diskutojmë për të riparuar rrjetet e energjisë elektrike, rrjetet e furnizimit me ujë, infrastrukturën rrugore.”
“Janos” shkatërroi plotësisht prodhimin bujqësor. Fermerët nuk patën kohë të korrin të mbjellat e tyre. Kërkesat janë për procedura të shpejta shtetërore që do të çojnë në dëmshpërblimin e viktimave dhe të prekurve nga cikloni.
Kryetari i bashkisë së Samis, Gerasimos Monia e cilësoi këtë si një katastrofë.
“Të gjitha shtëpitë në Agia Efimia dhe Assos janë përmbytur. Njerëzit kanë mbetur me rrobat që kishin veshur, nuk kanë asgjë. Rrjeti ynë rrugor është dëmtuar. Në të gjitha pikat ka rrëshqitje dheu në rrugë. Prodhimi bujqësor është dëmtuar i gjithi. Rrjeti i furnizimit me ujë në Agia Efimia ka një problem, ne po përpiqemi ta rregullojmë atë. Gjëja e parë që përpiqemi të bëjmë si bashki është të pastrojmë fshatrat. Po përpiqemi të fusim njerëzit në shtëpitë e tyre sa më shpejt të jetë e mundur. Dimri është përpara nesh. Paratë janë të nevojshme për të bërë projekte”, tha ai për mediat greke.
Sipas mediave greke, ndalesa e fundit e ciklonit “Janos” do të jetë Kreta. Por autoritetet thonë se në orët e ardhshme do të ketë një përmirësim të motit.
Deri tnai, në zona të ndryshme të Greqisë 2.450 njerëz kanë bërë thirrje për ndihmë, ndërsa janë organizuar 942 operacione kërkim-shpëtimi.
