Ministri i Jashtëm i Izraelit ka reaguar pas vendimit të Parlamentit të Shqipërisë për të shpallur Iranin shtet që sponsorizon terrorizmin, duke e cilësuar këtë hap si historik.
Në një reagim publik, ministri Gideon Sa’ar përgëzoi kryeministrin shqiptar, Edi Rama, si dhe Kuvendin e Shqipërisë për miratimin e rezolutës. Sipas tij, shpallja e Republikës Islamike të Iranit si shtet që sponsorizon terrorizmin përbën një qëndrim të fortë në mbrojtje të vlerave demokratike.
Ai theksoi se, sipas përmbajtjes së rezolutës, terrorizmi në të gjitha format e tij mbetet një nga kërcënimet më serioze për shoqëritë demokratike, duke shtuar se ky vendim reflekton qartë dimensionin moral të politikës së jashtme të Shqipërisë.
“E përgëzoj Kryeministrin e Shqipërisë Edi Rama dhe Parlamentin e Shqipërisë për rezolutën historike të miratuar sot, duke e shpallur Republikën Islamike të Iranit një shtet mbështetës të terrorizmit. Sipas fjalëve të rezolutës: Terrorizmi në të gjitha format e tij përbën një nga kërcënimet më serioze për shoqëritë demokratike. Ky është një tjetër demonstrim i dimensionit të qartë moral në politikën e jashtme të Shqipërisë”, shkruan ministri.
Parlamenti shqiptar shpalli sot Iranin shtet që sponsorizon terrorizmin. Me 79 vota pro dhe një votë abstenimi nga Redi Muçi i Lëvizjes Bashkë, Kuvendi miratoi rezolutën që shpall Iranin shtet sponsor të terrorizmit. Në rezolutë i bëhet thirrje qeverisë të shpallë menjëherë Gardën Revolucionare Islamike si organizatë terroriste, si dhe të shpallë gjithashtu Hezbollah-un si një organizatë terroriste proxy të Republikës Islamike të Iranit.
