Si çdo të diel në ekranin e Vizion Plus në emisionin “Studio Sport” të moderuar nga Vilma Masha është bërë skaneri i kampionati shqiptar, ku janë komentuar rezultatet e javës.
Humbja e Tiranës përballë Vllaznisë në kryeqytet dhe barazimi i Partizanit në Kukës ishin dy pikat ku u ndalën të ftuarit e mbrëmjes.
Për trajnerin Shpëtim Duro kampionatin e ka shkatërruar formula, pasi skuadrat nuk kanë më interes të dalin në vend të parë, pasi do ju mjaftonte dhe vendi i katërt për të synuar titulli.
“Më vjen keq që e them por formula ka prishur kampionatin. Siç e tha edhe Keko në fillim të emisionit nuk ka problem që Partizani ka marrë 6 barazime rresht. E kuptoni apo jo, kur e drejtoja unë Partizanin nëse merrje një barazim, kishe gjithë javën analizë, ndërsa sot nuk prish punë, pasi Partizani është në katërshe. Gjithashtu edhe Tirana pavarësisht humbjes në fund do të jetë në katërshe”, u shpreh Duro.
Ndërkohë lidhur me humbjen e Tiranës, ish-trajneri i kombëtares shqiptare, Astrit Hafizi tha se kriza e bardhebluve ka nisur që me largimine Orges Shehit si trajner.
“Kriza e Tiranës ka nisur që në momentin që larguan Orges Shehin”, tha Hafizi.
/Vizionplus.tv/
