Presidenti serb Aleksandër Vuçiç ka reaguar për sulmin ndaj kanalit të ujit Ibër-Lepenc që ndodhi mbrëmjen e së premtes.
Vuçiç u shpreh se Serbia ka njohuri të caktuara se kush mund të jetë autori.
“Ne si shtet serioz nuk jemi marrë me akuzat. Hetimi do të tregojë, kemi dyshime të caktuara, mendojmë se kemi informacione të caktuara dhe kush mund të jetë autori”, theksoi Presidenti serb.
Vuçiç shtoi se institucionet kompetente në Beograd do të vazhdojnë hetimet, duke informuar në mënyrë periodike opinionin publik për çdo zbulim.
Presidenti u shpreh gjithashtu se autoritetet në Beograd, në përputhje me Marrëveshjen e Brukselit, janë të gatshme për bashkëpunim jo vetëm me EULEX-in dhe KFOR-in, por edhe me Prishtinën.
“Ne jemi të hapur dhe absolutisht të gatshëm për të biseduar”, tha Vuçiç.
