Një aksident tragjik është regjistruar këtë të martë në autostradën Durrës-Tiranë, ku autobusi i linjës Berat-Tiranë u përmbys. Si pasojë humbi jetën shoferi 36-vjeçar dhe u plagosën 12 pasagjerë.
Një turiste amerikane, e cila ishte pasagjere e autobusit ka rrëfyer momentet e panikut që përjetoi, duke dhënë detaje tronditëse për sekondat para dhe pas përmbysjes së mjetit.
Ajo tregon se shoferi lëvizte në mënyrë të paqëndrueshme gjatë udhëtimit. Më tej, turistja amerikane shtoi se gjithçka ndodhi shumë shpejt, Brenda disa sekondave.
“Po shikoja poshtë dhe më pas ngrita kokën. Ndjeva autobusin që po dilte nga rruga. Kur ngrita sytë, gjithçka ndodhi brenda pak sekondash. Papritur autobusi u përmbys në krah dhe njerëzit nisën të bërtisnin. Gjaku po më pikonte, sepse unë isha në anën e poshtme. Fillimisht kontrollova nëse isha mirë, pastaj dola jashtë. Pas meje po dilte edhe një person tjetër dhe ne dolëm nga pjesa e pasme e autobusit. Njerëzit ishin të gjakosur, bërtisnin. Menjëherë erdhën për të ndihmuar njerëzit nga ndërtesa aty pranë. Ndaluan edhe makinat. Shqiptarët janë njerëz të mrekullueshëm, më sollën ujë. Kjo ishte e gjitha. Unë pata shumë, shumë fat. Falë Zotit.
Arrita të marr të gjitha sendet e mia, gjithçka. Edhe një fotografi i mbijetoi aksidentit. Ishte e pabesueshme. Kush do ta kishte menduar? Gjatë gjithë rrugës shoferi lëvizte paksa në mënyrë të paqëndrueshme. Mendova se ndoshta ishte normale për autobusin, por nuk e di. Isha ulur në anën e djathtë, në sediljen e dytë. M’u duk se personat që u plagosën më rëndë ishin në anën e majtë të autobusit”, tha ajo.
/vizionplus.tv
