Ish-ministri i Shëndetësisë, Ilir Beqaj kërkoi që strukturat që kanë për detyrë inspektimin e shëndetësisë të vihen në punë për shkeljen e ligjit nga spitalet private. Teksa këto ditë “Vizion Plus” ka treguar sesi strukturat spitalore private kanë trajtuar pacientë me COVID në shkelje të hapur të ligjit, Beqaj tha spitalet publike kanë patur gjithmonë shtretër të lirë për kurimin e tyre. Në një intervistë për edicionin qendror të lajmeve në “Vizion Plus”, ai nënvizoi se spitalet publike kanë patur mundësi për trajtimin e çdo pacienti.
“Struktuarat publike asnjëherë nuk kanë qenë të tejmbushura në kapacitete, që të mos ofronin shërbim për qytetarët. Kanë patur mundësi të ofrojnë shërbim për të gjithë qytetarët që kanë patur nevojë. Ne nuk kemi thënmë që nuk kemi hapësirë te publiku dhe po i çojmë në privat. Nuk mund të jenë shumë njerëz që janë trajtuar. Strukturat që kanë për detyrë të inspektojnë shëndetësisë, duhet të bëjnë një punë shumë më të mirë për të zbatuar këtë klauzolë.”
Këtë të mërkurë “Vizion Plus” tregoi sesi spitalet private shkelin ligjin për sëmundjet infective, i cili parashikon qartë mënyrën e trajtimit të pacientëve në situatë epidemike. Neni katër i tij thekson se mjekimi duhet të jetë tërësisht falas në çdo strukturë qofshin këto shtetërore apo private. Por në realitet ndodh krejt e kundërta sepse vetëm një natë akomodimi në spitalet private kalon shumën e 2.000 eurove.
