Deputeti i PS, Ervin Bushati mendon se shkarkimi i presidentit Ilir Meta është i domosdoshëm.
Për “Quo Vadis” në “Vizion Plus”, me moderatoren Pranvera Borakaj, Bushati përsëriti vendosmërinë e mazhorancës për t’i shkuar deri në fund procesit.
Për të, Ilir Meta në këto vite në krye të Presidencës ka treguar se është president i LSI dhe jo i shqiptarëve.
“Presidenti nuk diti të ngrihet në lartësinë e detyrës. Ne kemi besuar se Ilir Meta do të ngrihej mbi interesat personalë, familjarë. Nuk e bëri sakrificën sublime për shqiptarët dhe të jetë presidenti i shqiptarëve, mbeti presidenti i LSI. Mori hapa që në mendimin tonë janë shumë të dëmshme për demokracinë, rendin në vend dhe kanë rrezikuar edhe Republikën e Shqipërisë. Nuk mund të mos bënim detyrën dhe ta çonim këtë para Kuvendit. Si akt politik, ne kemi ndërmarrë këtë iniciativë. Nuk mund të ketë kompromis në këtë pikë, ne do ta çojmë këtë proces deri në fund.”
