Policia e Fierit ka arrestuar në flagrancë dy shtetas të dyshuar si autorë të zjarrvënieve që shkaktuan dëme të konsiderueshme në Divjakë dhe Mallakastër.
Në fshatin Mërtish të Divjakës, një 65-vjeçar, K. A., banues në fshatin Korije, ndezi zjarr për të djegur mbeturina në një tokë të marrë me qira. Flakët dolën jashtë kontrollit dhe për pasojë u dogjën 170 rrënjë ulliri në pronësi të një qytetari tjetër. Autori u arrestua nga specialistët për Hetimin e Krimeve të Komisariatit të Policisë Divjakë.
Ndërkohë, në fshatin Belishovë të Mallakastrës, u arrestua 41-vjeçari P. J., i cili kishte ndezur zjarr për të djegur ferra në pronën e tij. Flakët u përhapën duke djegur një sipërfaqe me shkurre.
Materialet procedurale për të dy rastet i janë referuar Prokurorisë pranë Gjykatës së Shkallës së Parë Fier, për veprime të mëtejshme.
Policia e Fierit i bën thirrje qytetarëve që të shmangin ndezjen e zjarreve në çdo rrethanë, pasi do të përballen me pasoja ligjore. Çdo rast zjarrvënieje apo paligjshmërie mund të denoncohet në numrin pa pagesë 112, me garanci për anonimat dhe reagim të menjëhershëm nga ana e Policisë.
/vizionplus.tv
