Policia e Korçës ka finalizuar operacionin policor të koduar “Veprimtaria”, në kuadër të goditjes së veprimtarisë kriminale në fushën e narkotikëve.
Si rezultat i operacionit, u arrestua në flagrancë shtetasi K. S., 49 vjeç, banues në fshatin Buçimas, Pogradec, i cili dyshohet se shiste lëndë narkotike në lokalin e tij.
Gjatë kontrollit të ushtruar në ambientet e lokalit, të ndodhur në lagjen nr. 1 të Pogradecit, shërbimet e Policisë gjetën dhe sekuestruan një sasi lënde të dyshuar narkotike cannabis sativa.
Po ashtu, nisi procedimi penal për një 15-vjeçar, i cili u kap me një sasi të vogël lënde narkotike gjatë kontrollit fizik, të cilën dyshohet se e kishte blerë nga pronari i lokalit.
Në cilësinë e provës materiale u sekuestruan një sasi lënde narkotike, 3 telefona celularë dhe një sasi parash.
Në bashkëpunim me Prokurorinë, vijojnë hetimet për dokumentimin e plotë ligjor të kësaj veprimtarie kriminale. Materialet i janë referuar Prokurorisë pranë Gjykatës së Juridiksionit të Përgjithshëm Korçë për veprime të mëtejshme.
/vizionplus.tv
