Ambasadori i Bashkimit Evropian në Shqipëri, Silvio Gonzato, ka shprehur mirënjohjen e tij për vendin dhe qytetarët shqiptarë në përfundim të mandatit të tij 3-vjeçar.
Në një postim në rrjetet sociale, pas nderimit me Yllin e Madh të Medaljes “Benemerenti” nga kryeministri Edi Rama, Gonzato tha se angazhimi i tij në Shqipëri është udhëhequr nga vlerat evropiane të lirisë, barazisë, respektimit të të drejtave të njeriut dhe sundimit të ligjit.
“Bashkimi Evropian ka qenë gjithmonë për mua shumë më tepër sesa një treg apo një ekonomi e përbashkët. Ai ka të bëjë me njerëzit dhe vlerat që ndajmë”, shkroi Gonzato.
Ambasadori falënderoi shqiptarët që ka takuar gjatë këtij rrugëtimi, duke theksuar se ka qenë i privilegjuar të ishte pranë tyre në një periudhë kur Shqipëria po afrohet gjithnjë e më shumë me objektivin e anëtarësimit në Bashkimin Evropian.
Gonzato vlerësoi se puna e BE-së në Shqipëri ka qenë e karakterizuar nga kërkesa për reforma, por edhe nga drejtësia në vlerësim.
“Kemi qenë kërkues, por të drejtë. Kemi bërë thirrje që të gjithë të jenë pjesë e këtij rrugëtimi drejt një shoqërie ku institucionet mbrojnë të drejtat e çdo qytetari dhe ku brezi i ri ka zërin e tij në formësimin e së ardhmes së këtij vendi”, u shpreh ai.
Në fund të mesazhit të tij, Gonzato falënderoi kryeministrin Edi Rama për dekorimin me Yllin e Madh të Medaljes “Benemerenti”, duke shtuar se Shqipëria do të mbetet në zemrën e tij për gjithë jetën.
“Ky vend do të mbetet në zemrën time për gjithë jetën. Shihemi në BE”, e mbylli mesazhin ambasadori i BE-së.
