“Lëvizja Shqipëria Bashkë” e drejtuar nga Adriatik lapaj, me anë të një reagimi në rrjetet sociale kërkon të ulë tensionin brenda koalicionit me partinë e drejtuar nga Endrit Shabani dhe Panajot Soko.
Në reagim Lëvizja Shqipëria Bëhet ju bën thirrje anëtarëve dhe simpatizantëve që të ndalojnë gjuhën e urrejtjes ndaj pjesës tjetër të koalicionit, pas përplasjes që patën ditët e fundit për madatin e deputetit të fituar në zgjedhjet e 11 majit, se kush do të ulet në Kuvend në shtator.
Shqipëria Bashkë i bën thirrje palës tjetër të drejtuar nga Shabani dhe Soko që të reflektojnë dhe të ulen për zgjidhjen e situatës, dhe të nisin punën për përgatijen e zgjedhjeve lokale.
Reagimi i plotë:
Në dritën e ngjarjeve të fundit dhe përmbajtjeve të publikuara në rrjet, dëshirojmë të sqarojmë se nuk përfaqësojmë dhe nuk mbështesim asnjë formë gjuhe fyese, kërcënuese apo të dhunshme që bie ndesh me vlerat tona.
Ne u bëjmë thirrje të gjithë ndjekësve tanë, simpatizantëve, aktivistëve dhe anëtarëve të angazhuar me ne, të refuzojnë në çdo moment gjuhën e dhunës pavarësisht ngarkesës emocionale nga çdo padrejtësi.
Por, po aq të qartë duam të jemi edhe për një tjetër të vërtetë:
Në këtë histori, të dhunuarit e vetëm janë 64.000 qytetarët që na votëbesuan dhe qindra aktivistët tanë që dhanë gjithçka në këtë betejë.
Ndiejmë keqardhje të sinqertë për situatën e krijuar në lidhje me çështjen e mandatit dhe ju sigurojmë se nuk po i shmangemi përgjegjësisë sonë, por po bëjmë çdo përpjekje të ndershme për të mos ju zhgënjyer dhe për të ruajtur besimin që na keni dhënë.
Sepse për ne, gara e ndershme dhe meritokracia janë dy shtyllat mbi të cilat u ngrit “Shqipëria Bëhet”. Ishin të vetmet armë që kishim përballë një sistemi të kalbur. Ishin këto dy parime që frymëzuan 64.000 qytetarë të na mbështesin pa interes.
Ndaj po goditen sot, me shënjestër të saktë, si nga snajperistët e zakonshëm të sistemit, ashtu edhe nga ata që u shërbejnë si zëdhënës.
Nëse gabimi ynë është dorështrirja për bashkëpunim, mund të na gjykoni! Ne po kërkojmë thjesht që marrëveshja parazgjedhore të realizohet ashtu siç u dolëm qytetarëve në fushatë. Është pikërisht ajo pika që dëshmon qasjen tonë për garën.
Theksojmë se ne nuk do të heqim dorë nga besimi që gara e ndershme është rruga e vetme për të rikthyer besimin në demokraci. Përtej çdo shantazhi e hileje, brenda e jashtë sistemit, ne do të qëndrojmë.
Jemi në pritje të reflektimit dhe uljes për zgjidhje nga pala tjetër në Koalicion. Ne e konsiderojmë këtë një moment që duhet tejkaluar si detyrë ndaj zgjedhësve tanë. Jemi në pritje të Z.Shabani dhe Z.Soko për ta adresuar me maturi e të vazhdojmë punën për zgjedhjet vendore.
Sepse rrugën e nisur, nuk do ta lëmë në mes!
Kujtojmë që situata u agravua në momentin që Zeqir Kordhoni daja i Endrit Shabanit iu drejtua KQZ-së dhe i kërkonte amndatin nëse do t’i vinte radha.
Pas këtij momenti pati një sërë reagimesh dhe kundër reagimesh nga ana e Lapajt dhe Shabanit, ku nuk munguan as akuzat ndaj njëri-tjetrit.
