I dërguari amerikan për Ballkanin Perëndimor, Gabriel Escobar ka deklaruar se Kosova nuk po e trajton SHBA si partner, pas mospërmbushjes së kërkesave për çështjen e dinarit serb.
“Nuk dua të flas se cilat janë pasojat, por mendoj se deklaratat tona kanë treguar qartë se ku po shkojnë raportet tona diplomatike dhe politike. Ne jemi shumë të shqetësuar, sepse qeveria e Kosovës nuk po na trajton si partner, ata nuk punojnë me ne për stabilitetin rajonal dhe minojnë dialogun”, tha Escobar.
Duke folur për zërin e Amerikës në Serbi, Escobar tha se sjellja e qeverisë së Prishtinës vështirëson punën e SHBA-së që ta ndihmojë Kosovën në anëtarësimin në organizata ndërkombëtare.
“Ambasadori Hovenier e ka thënë, kjo ndërlikon kapacitetin tonë për të ndihmuar Kosovën. Sa herë që ne flasim për Kosovën me partnerët e tjerë, veçmas me ata që nuk e njohin atë, ata e shohin se Kosova nuk përmbush detyrimet e saj të dialogut që është nën ombrellën e BE-së, që përfaqëson të gjithë BE-në. Prandaj, na bëhet e vështirë që të mbrojmë në çfarëdo mënyre argumentet e Kosovës, përfshirë anëtarësimin në BE dhe NATO, në Këshillin e Evropës dhe në shumë organizata të tjera”, u shpreh ai.
Sipas zyrtarit të lartë, Kosova duhet të zbatojë marrëveshjen e arritur në dialogun e Brukselit për themelimin e Asociacionit të komunave me shumicë serbe. Dhe se përmes asociacionit, do të mund të zgjidhej edhe çështja e përdorimit të dinarit serb.
SHBA dhe vendet BE Kishin kërkuar nga Kosova shtyrjen e zbatimit të vendimit të Bankës Qendrore që përjashton nga përdorimi në Kosovë valutën serbe. Ky vendim ka hyrë tashmë në fuqi që prej 1 shkurtit. /vizionplus.tv
