Ndërmjetësi i paqes, Pakistani, ka ndarë me Shtetet e Bashkuara një propozim të rishikuar nga Irani për t’i dhënë fund luftës në Lindjen e Mesme, ka thënë një burim pakistanez për Reuters të hënën, duke paralajmëruar se palët “nuk kanë shumë kohë” për të ngushtuar dallimet e tyre.
Zëdhënësi i ministrisë së Jashtme iraniane, Esmaeil Baghaei, më vonë ka konfirmuar se pikëpamjet e Teheranit i ishin “transmetuar palës amerikane përmes Pakistanit”, por nuk ka dhënë detaje.
Një armëpushim i brishtë është në fuqi pas gjashtë javësh lufte që pasoi sulmet ajrore SHBA-Izrael ndaj Iranit, por bisedimet e ndërmjetësuara nga Pakistani kanë ngecur dhe presidenti i SHBA-së, Donald Trump, ka thënë se armëpushimi është “në gjendje jete”.
Burimi pakistanez nuk ka dhënë detaje mbi propozimin e rishikuar. I pyetur nëse do të duhej kohë për të mbyllur boshllëqet, burimi ka thënë se palët “vazhdojnë të ndryshojnë synimet e tyre” teksa ka shtuar se “nuk ka shumë kohë”.
Uashingtoni i ka kërkuar Teheranit të çmontojë programin e tij bërthamor dhe të heqë një bllokadë efektive në Ngushticën e Hormuzit, nëpër të cilën zakonisht kalon rreth një e pesta e furnizimit botëror me naftë dhe gaz natyror të lëngshëm.
Irani ka kërkuar kompensim për dëmet e luftës, fundin e bllokadës amerikane të porteve iraniane dhe ndalimin e luftimeve në të gjitha frontet, përfshirë në Liban, ku Izraeli po lufton milicinë Hezbollah të mbështetur nga Irani.
Trumpi ka thënë në një postim në Truth Social në fundjavë se “ora po ecën” për Iranin, duke shtuar se “më mirë të lëvizin, SHPEJT, ose nuk do të mbetet asgjë prej tyre”.
Trumpi pritet të takohet me këshilltarët kryesorë të sigurisë kombëtare të martën për të diskutuar opsionet për rifillimin e veprimeve ushtarake, ka raportuar.
Çështjet që pengojnë negociatat përfshijnë gjithashtu ambiciet bërthamore të Iranit. SHBA-ja dhe fuqitë e tjera të mëdha duan të sigurohen që Irani të mos mund të zhvillojë armë bërthamore.
Teherani mohon se është përpjekur ta bëjë këtë dhe gjithashtu dëshiron kompensim për dëmet e luftës, një garanci se nuk do të ketë sulme të mëtejshme dhe rifillimin e shitjeve të naftës iraniane.
Baghaei ka thënë se Teherani ishte i përgatitur për të gjitha skenarët.
“Sa i përket kërcënimeve të tyre, jini të sigurt se ne jemi plotësisht të vetëdijshëm se si t’i përgjigjemi në mënyrë të përshtatshme edhe gabimit më të vogël nga pala kundërshtare”, ka thënë ai në një konferencë shtypi javore të transmetuar në televizion.
