Eksperti i sigurisë Faik Basha tha në studion e QUO VADIS se kapacitetet ushtarake të Shteteve të Bashkuara të Amerikës janë shumë të mëdha për të përballuar edhe një luftë disa-vjeçare.
Sipas tij, lufta do të përfundojë brenda 40 ditëve ose, në rastin më të keq, për 3 muaj.
Ai theksoi se Irani ka kryesisht raketa balistike, por mungesë force detare dhe inteligjence të krahasueshme me kundërshtarët.
Sipas tij, arsenali raketor i Iranit mund të arrijë deri në rreth 6 mijë raketa, një pjesë e të cilave janë përdorur edhe gjatë përplasjes 12-ditore të vitit të kaluar.
Basha shtoi gjithashtu se Shtetet e Bashkuara të Amerikës dhe Izraeli kanë zhvilluar për më shumë se dy vite një vëzhgim të detajuar të objekteve strategjike në Iran, duke analizuar çdo aspekt të aktivitetit ushtarak.
Sipas analistit, aktualisht Irani ndodhet në një situatë të vështirë.
Pjesë nga biseda:
Borakaj: Në rast sulmi në vendet e Lindjes, cilat janë masat që merren në një vend të vogël si Shqipëria?
Basha: Sa më shumë sekrete të ketë një shtet në luftë, aq më i fortë është. Është bërë një test i përgjithshëm që ka qenë 12-ditor në qershor. Raketat amerikane janë të pafundme për të përballuar një konflikt disa-vjeçar me këtë intensitet që është tani.
Borakaj: Pse mund të zgjasë me vite ky konflikt?
Basha: SHBA mund të përballojnë një luftë të tillë deri në 15 vite me raketat që kanë. Nuk është depo e SHBA-ve 3 mijë raketa. 3 mijë raketa i ka vetëm një bazë. Strategjia e SHBA nuk shkon kurrë me 4 mijë raketa, se 4 mijë raketa i ka pasur edhe xhaxhi Enver. Irani është pa forcë ajrore, detare dhe pa inteligjencë. Irani ka vetëm raketa balistike, të cilat për shkak të kohës dhe përdorimit nuk janë në sasi të pafundme. E gjithë sasia mund të shkojë deri në 6 mijë raketa, jo më shumë. Një mijë raketa nga këto mund të jenë shpenzuar, mbase edhe më shumë, pasi janë përdorur edhe në luftën 12-ditore vitin e kaluar. Dronë ka më shumë. Është vëzhguar më shumë se 2 vite çdo objekt nga Amerika në Iran. Është vëzhguar ku hanë, ku pinë, ku shkojnë dhe ku e kanë aktivitetin. Është bërë një skaner i tërë dinamikës ushtarake të Iranit. SHBA dhe Izraeli, sa i përket shërbimeve inteligjente, janë të paparë. Madje ata prodhojnë dhe të tjerët kopjojnë.
Borakaj: A është në hall Irani në këtë moment?
Basha: Që është në hall, nuk ka dyshim. Nëse strategjia brenda Iranit do të fillojë një lëvizje të brendshme, kjo luftë do të përfundojë brenda 40 ditëve. Nëse diçka do të dështojë për shkak të parashikimeve që janë bërë, më e keqja është tre muaj. Dhe për 3 muaj ekonomia e SHBA nuk do të cenohet aq sa të bëhet problem.
/vizionplus.tv
