Ministrja e Arsimit, Besa Shahini ka shkuar në spitalin e Fierit ku ka vizituar nxënësit e shkollës së mesme “Janaq Kilica, të cilët patën probleme me frymëmarrjen gjatë orës së mësimit.
Në një postim në “Facebook”, Shahini konfirmoi se gjendja e tyre shëndetësore është normalizuar, ndërsa theksoi se është hera e dytë që ndodh.
“Sapo dola nga vizita me nxënësit ne Fier, të cilët sot ishin ekspozuar ndaj një substance sipas mjekëve e padëmshme, por që irriton kanalet e frymëmarrjes, të hedhur në shkollën e mesme “Janaq Kilica”, Fier. Fatmirësisht, gjendja e tyre momentalisht është normale dhe drejt stabilizimit të plotë. Është hera e dytë që ndodh dhe na shqetëson ky fakt. Drejtuesja e prokurorisë dhe ai i policisë më siguruan se së shpejti do të dalin me përfundimet e tyre.”
Shahini siguroi se do të merren masa disiplinore dhe do të shtohen oficerët e sigurisë, të cilët po komunikojmë me mësuesit që të jenë më vigjilentë në raste të tilla.
“Drejtorja e shkollës ka gjithë mbështetjen tonë për vendosjen e disiplinës në shkollë. Jemi në kontakt të vazhdueshëm me prindërit që të qetësohen fillimisht nga situata absurde, por edhe të komunikojnë njëkohësisht me fëmijët e tyre për t’i ndërgjegjësuar se akte të tilla janë totalisht të papranueshme.”
