Ministrja e Arsimit Besa Shahini zhvilloi të hënën një komunikim me rektorët e universiteteve publike mbi marrjen e masave për mbylljen e vitit akademik 2019-2020.
Shahini shprehet se urdhri për marrjen e masave kërkon nga universitetet që të fillojnë një planifikim serioz për mbylljen e vitit akademik në kushte të jashtëzakonshme. Ajo shtoi se çfarëdo hapje e pjesshme e universiteteve duhet të përcillet me protokolle të ruajtjes së shëndetit të studentëve dhe pedagogëve.
Ministrja shprehet se universitetet do të sjellin planet se si do të veprojmë me studentët për këtë vit akademik deri më datë 15 maj.
“Situata me përhapjen e koronavirusit të ri në Shqipëri po shkon drejt përmirësimit nga dita në ditë, por nuk jemi ende plotësisht jashtë rrezikut. Kemi kërkuar nga universitetet që të planifikojnë se cilat janë ato lëndë që do të mbyllen plotësisht online, pra nuk do të kenë nevojë të kthejnë studentë fare në auditorë apo laboratorë; sa është numri i studentëve që kanë nevojë të kthehen në auditorë e laboratorë për punë të ndryshme para provimeve; dhe sa është numri i saktë i studentëve që do të bëjnë provime gjatë korrikut dhe fillim-gushtit të këtij viti – gjithmonë duke prioritizuar studentët që do të diplomohen”.
