Këto ditë gushti kanë vështirësuar edhe më shumë trafikun në Lezhë. Sezoni turistik, tashmë në kulmin e tij, ka sjellë një fluks të madh pushuesish, duke rënduar ndjeshëm qarkullimin në akset kryesore.
Pushuesit nga Kosova, që zgjedhin Shëngjinin si destinacion për pushimet verore, kanë krijuar radhë të gjata automjetesh, me trafikun që nis që nga kryqëzimi i Milotit dhe vijon deri në Lezhë.
Ndërkohë, edhe emigrantët që zgjedhin të udhëtojnë drejt Shqipërisë përmes rrugëve tokësore kanë shtuar ndjeshëm fluksin e automjeteve që hyjnë nga pikat doganore. Në këtë pjesë, trafiku nis që në Balldre dhe shtrihet për rreth 5 kilometra, deri në dalje të qytetit të Lezhës.
Kjo situatë përsëritet prej vitesh, veçanërisht gjatë muajve të verës, kur numri i automjeteve shumëfishohet dhe infrastruktura rrugore nuk përballon dot fluksin.
Por problematikat me qarkullimin nuk janë vetëm në akset kombëtare. Edhe brenda qytetit të Lezhës, punimet për rrjetin e ujërave të zeza kanë sjellë vështirësi në lëvizjen e automjeteve, duke shtuar edhe më shumë kaosin në trafik.
Në kulmin e sezonit turistik, Lezha vijon të përballet me të njëjtën problematikë, ndërsa mungesa e zgjidhjeve afatgjata për trafikun mbetet një shqetësim i përsëritur për banorët, pushuesit dhe drejtuesit e automjeteve, ndërsa autostrada e tenderuar Milot-Balldre pritet të sjellë ndryshim.
