Ndërsa duhen dhe tre ditë nga përfundimi i afatit për konvertimin e targave në RKS, presidenti serb Aleksandër Vuçiç ka mbledhur në Beograd Këshillin e Sigurisë Kombëtare. Pjesë e takimit ishin edhe përfaqësuesit e serbëve të Kosovës si dhe kryetari i Listës Serbe Goran Rakiç.
Pas takimit, ky i fundit u shpreh për mediat, se serbët e veriut do të protestojnë duke bllokuar rrugët.
GORAN RAKIÇ
KRYETARI I LISTËS SERBE
Nëse Prishtina fillon me dhunë, me ndonjë veprim lidhur me konfiskimin e automjeteve, ne do të bllokojmë të gjitha vendkalimet dhe hyrjet nga veriu drejt Kosovës qendrore. Nëse ata konfiskojë pronën tonë, ne do të përdorim të gjitha mjetet në mënyrë demokratike dhe paqësore, për të rezistuar dhe do të jetë rezistencë e popullit.
Rakiç paralajmëroi se situata mund të dalë shpejt jashtë kontrollit.
GORAN RAKIÇ
KRYETARI I LISTËS SERBE
Kur themi rezistencë paqësore demokratike të popullit, ne me të vërtetë atë e duam, por nuk e di se në çfarë do të shndërrohet e gjitha kjo dhe si do të zhvillohet situata në terren. As unë dhe askush nga ne nuk e di çfarë mund të ndodhë nëse dikush me dhunë fillon të na marrë pronën.
Dy ditë më parë, kryeministri i Kosovës Albin Kurti bëri të qartë se afati për targat nuk do të shtyhej.
