Policia e Durrësit ka sekuestruar pasuri të konsiderueshme të dyshuara si të përfituara nga veprimtaria kriminale e dy vëllezërve, nën hetim për vepra të rënda penale. Seksioni për Hetimin e Krimeve Ekonomike dhe Financiare në Drejtorinë Vendore të Policisë Durrës ka ekzekutuar vendimin penal të Gjykatës së Posaçme të Shkallës së Parë për Korrupsionin dhe Krimin e Organizuar, vendim i cili është lënë në fuqi edhe nga Apeli i Posaçëm.
Pasuria, e cila ishte në përdorim të shtetasit L. K., përfshin 1050 m² truall si dhe një objekt njëkatësh me oborr dhe pishinë. Ajo i është dorëzuar zyrtarisht Agjencisë për Administrimin e Pasurive të Sekuestruara dhe të Konfiskuara, në prani të familjarëve të shtetasit në fjalë.
Sipas hetimeve, dyshohet se këto pasuri janë përfituar nga veprimtaria kriminale e dy djemve të L. K., të cilët janë nën hetim për falsifikim dokumentesh identifikimi, si dhe për falsifikim vulash dhe formularësh. Ata janë gjithashtu të përfshirë në një procedim penal të nisur që në vitin 2017, ku dyshohet se janë autorë të një vrasjeje të kryer në rrethana të cilësuara dhe në bashkëpunim, si dhe për mbajtje pa leje të armëve dhe municioneve.
Operacioni për sekuestrimin e pasurive vjen si pjesë e luftës kundër krimit të organizuar dhe goditjes së pasurive të përfituara në mënyrë të paligjshme. Autoritetet njoftojnë se hetimet vijojnë për identifikimin dhe sekuestrimin e pasurive të tjera që mund të jenë të lidhura me veprimtarinë kriminale.
/vizionplus.tv
