Sekretari amerikan i Shtetit, Antony Blinken ka nisur udhëtimin e tij në Lindjen e Mesme. Ndalesa e pare është ne Arabinë Saudite për të diskutuar disa çështje përfshirë edhe qeverisjen e Gazës, pasi të përfundojë lufta.
Në takimin me ministrin e jashtëm saudit në Riad Blinken ka theksuar se mënyra me efektive për të lehtësuar vuajtjet humanitare në Gaza është që të sigurohet një armëpushim mes Izraelit e Hamasit.
Ndërkohë zyrtari i lartë amerikan pritet të ketë bisedime me liderët sauditë si dhe të zhvillojë po ashtu një takim me homologët e pesë shteteve arabe.
Më pas Blinken do të shkojë në Izrael për të rritur presionin ndaj kryeministrit të Benjamin Netanyahu.
Po ashtu sekretari amerikan i shtetit do të përpiqet të bashkojë vendet arabe me shtetet evropiane dhe të diskutojë se si Evropa mund të ndihmojë përpjekjet e rindërtimit të Gazës, e cila është kthyer në një shkretëtirë nga bombardimet gjashtëmujore izraelite.
Më herët presidenti amerikan Joe Biden ka folur me kryeministrin Benjamin Netanjahu dhe ka përsëritur pozicionin e tij të qartë kundër nisjes së një ofensive izraelite në Rafah. /vizionplus.tv