Një euro po këmbehet në ditët e fundit me afro 96 lekë dhe ky zhvlerësim për deputetët është shqetësues për shkak të ndikimit negativ që ka në eksportet shqiptare.
Por Banka e Shqipërisë i qëndron regjimit të lirë të kursit të këmbimit dhe thekson se ai nuk parashikohet dot.
“Mbiçmimi i kursit të këmbimit ndikon në mbajtjen nën kontroll të inflacionit dhe ky është objektivi jonë kryesor. Ne duhet të kemi një krizë ekonomike, një ekonomi të dobët që të mbiçmohet euro, por ne harrojmë që një mbiçmim i euros dhe zhvlerësim i lekut, do të transmetohej në rritje të çmimeve. Kjo do të ulte mirëqenien e popullatës. Ne nuk kemi ndërhyrë për të mbrojtur industri të caktuara, si fasonët, bujqësia. Duhen mbrojtur, ndikohen negativisht nga kursi, por duhen mbrojtur me politika fiskale jo me politika monetare. Ne kemi tërhequr nga tregu 930 mln euro. Mund të tërheqim edhe më shumë deri në fund të vitit. Nuk i komunikojmë këto tërheqje për të mos krijuar spekulime në treg. Nuk i publikojmë për të mos ndikuar në treg”, tha Gent Sejko, Guvernator i Bankës së Shqipërisë.
Gjatë raportimit në Komisionin e Ekonomisë, Sejko u pyet edhe për rritjen e çmimeve në tregun e pasurive të patundshme, për shkak të frikës se po krijohet një flluskë
“Një rritje kaq e shpejtë e çmimeve në tregun e ndërtimit a po krijon një flluskë?”, pyeti Jorida Tabaku, deputete e PD.
“Mos po ndërtojmë keq që do të thotë, mos po e përqendrojmë ndërtimin si sektor te ndërtimi i luksit, që afërmendsh do t’i mbajë çmimet lart gjithë kohës. Mos po e përqendrojmë ndërtimin në segmentin e rezidencave, zyrave, ndërkohë që oferta që vjen nga sektori i ndërtimit për strehim është e zbehtë?”, tha Erion Braçe, deputet i PS.
“Rritja e çmimit në sektorin e ndërtimit bazohet te kërkesa. A do të ketë flluskë apo jo ne prandaj kemi marrë masa. Për momentin, nga analizat tona nuk japin sinjalet e një flluske, por po e ndjekim. Kemi bërë një studim ku japim edhe disa rekomandime, e kemi dërguar në qeveri, preasidencië dhe kuvend”, u shpreh Gent Sejko, Guvernator i Bankës Së Shqipërisë
Sejko nënvizoi se tregu i pasurive të patundshme po mbahet nën vëzhgim nga Banka e Shqipërisë dhe se në muajt në vijim mund të ndërhyhet sërish me masa të tjera kufizuese nëse vihet re një rritje e paargumentuar e këtij sektori.
/vizionplus.tv
