Ish-presidenti francez Nicolas Sarkozy ka deklaruar se partia e ekstremit të djathtë e Marine Le Pen, Rassemblement National (RN), “nuk përbën rrezik” për Francën, dhe se ai nuk do të mbështeste një front të bashkuar partish kundër saj në zgjedhjet e ardhshme.
Në librin e tij të ri, të shkruar në një “tavolinë të vogël kompensatë” në burg, ku kohët e fundit kreu 20 ditë të një dënimi për komplot kriminal, Sarkozy thotë se shumë prej mbështetësve të tij të dikurshëm tani janë potencialisht votues të Le Pen, ndërsa lë të kuptohet se RN mund të përfshihet në vizionin e tij për një të djathtë të gjerë franceze.
Rruga për rindërtimin e kësaj të djathtë, shkruan ai, “mund të jetë e gjatë, por jam i bindur se mund të ndodhë vetëm përmes frymës së bashkimit në kuptimin më të gjerë të mundshëm, pa përjashtime dhe pa anatema”.
Komentet e Sarkozy në librin The Diary of a Prisoner vijnë në një moment kur partia e Le Pen kërkon të tërheqë votuesit tradicionalë të së djathtës, në përpjekje për të zgjeruar bazën e saj përpara zgjedhjeve presidenciale të vitit 2027, shkruan “The Guardian”.
Qëndrimet e tij bien në kundërshtim të fortë me pozicionin anti-ekstremit të djathtë që mbajti kur fitoi presidencën në vitin 2007, si dhe me thirrjen që bëri në vitin 2022 për të mbështetur qendrën e djathtë Emmanuel Macron kundër Le Pen “në interes të Francës”.
Në libër, i cili do të publikohet të mërkurën, Sarkozy përshkruan periudhën në burg para se të lirohej muajin e kaluar, ndërsa pret apelimin ndaj dënimit për një skemë të financimit të fushatës elektorale nga regjimi i ish-diktatorit libian Muammar Gaddafi.
Sarkozy, presidenti i parë në historinë moderne të Francës që ka hyrë në burg, thotë se ka telefonuar Le Pen për ta falënderuar për mbështetjen e saj “guximshme dhe të qartë” pas dënimit.
Ai shton se konteksti aktual “judicial” është diçka që ai dhe Le Pen e kanë të përbashkët. Për të ishte “veçanërisht tronditëse” që Le Pen u ndalua të kandidonte për poste publike, përfshirë presidencën e vitit 2027, pasi u shpall fajtore për përvetësim të fondeve të Parlamentit Europian në një shkallë të gjerë më herët gjatë këtij viti.
Le Pen do të përballet muajin e ardhshëm me një gjykim apelimi, i cili do të përcaktojë nëse ajo do të mund të kandidojë për presidente në vitin 2027, apo nëse do ta zëvendësojë kreu i partisë së saj, Jordan Bardella.
