“Sardelet” kanë pushtuar sheshin ”San Giovanni” në Romë duke protestuar kundër liderit të së djathtës ekstreme, Matteo Salvini. Kjo është demonstrata më e madhe qëkurse lëvizja e qytetarëve italianë është themeluar.
Më shumë se 100 mijë persona janë bërë bashkë në shesh me pankarta në duar dhe duke kënduar njëzëri këngën e famshme partizane antifashiste, Bella Ciao.
“Ka ardhur koha që njerëzit të mos rrinë më në mënyrë pasive në shtëpi, por të mbajnë një qëndrim”, tha një nga themeluesit e lëvizjes, Mattia Santori.
Në sheshin që historikisht është mbushur me protestues të së majtës, njerëz të moshave të ndryshme kanë bërë thirrje që perceptimet politike të ndryshojnë e ti largohen pikëpamjeve raciste.
Lëvizja e sardeleve filloi më 14 nëntor në Bolonjë, kur mijëra njerëz qëndruan ngjitur me njëri-tjetrin, ashtu si sardelet e konservuara, për të dënuar partinë antimigracion të Matteo Salvinit.
Që nga ajo kohë kësaj lëvizjeje i janë bashkuar mijëra italianë që kanë mbushur sheshet e qyteteve, duke i shndërruar ”Sardelet” në qendër të një debati kombëtar politik.