Samiti virtual i Zagrebit i cili u mbajt këtë të mërkurë mes liderve të BE dhe Ballkanit Perëndimor, theksoi edhe njëherë angazhimin dhe mbështetjen e unionit në rajon. Presidentja e KE, Ursula von der Leyen deklaroi se rajoni tashmë është pjesë e BE, ndërsa nxiti shtetet të vijojnë me reformat e sundimit të ligjit dhe luftën kundër korrupsionit.
“Takimi i sotëm BE-Ballkan Perëndimor në Samitin e Zagrebit ka treguar se jemi më të fortë të bashkuar. Nuk ka dyshim, që Ballkani Perëndimor i përket BE. Unë u bëj thirrje qeverive të tyre që të vazhdojnë të zbatojnë reformat, veçanërisht për sundimin e ligjit, luftën kundër korrupsionit dhe garantimin e lirisë së mediave”
Edhe presidenti i Këshillit Evropian, Charles Michel deklaroi se BE qëndron krah për krah me partnerët e Ballkanit Perëndimor. Ndërsa kryeministri i Kroacisë, Andrej Plenkoviç e konsideroi samitin një sinjal të fortë politik.
Në kuadër të krizës së shkaktuar nga koronaviruri, BE ka vendosur të ndihmojë rajonin me 3,3 miliardë euro të shpërndara në gjashtë vende në shenjë solidariteti. Këto fonde do t’i nënshtrohen mbikëqyrjes së rreptë nga institucionet e unionit.
Ne samitin e fundit, i cili u zhvillua me video-konference ne mesin e muajit mars, lideret e unionit vendosen nisjen e bisedimeve te anetaresimit me Shqiperine dhe Maqedonine e Veriut.
