Sallatë me brokoli nga shefja e kuzhinës Albana Mançja

Një sallatë e freskët dhe plot shije, që kombinon brokolin me perime të freskëta, arra dhe djathë të bardhë. Receta e shefes së kuzhinës Albana Mançja është e lehtë për t’u përgatitur dhe ideale për një vakt të shpejtë e të shëndetshëm.

Përbërësit:

– 1 tufë brokoli

– ½ spec i verdhë

– 6 domate

– 2 lugë gjelle arra

– 80 g djathë të bardhë

– 1 lugë kafeje mustardë

– 1½ lugë gjelle uthull molle

– Pak vaj ulliri

– Kripë dhe piper i zi

– Kopër

Përgatitja:

Vendosim një tenxhere me ujë të valuar. Ziejmë brokolin për 4–5 minuta, e kullojmë dhe e vendosim në një tas. Nëse kemi tenxhere me sitë për gatim në avull, mund ta gatuajmë brokolin në avull për 6 minuta.

Në tasin me brokoli shtojmë specin e prerë në shirita të hollë dhe i përziejmë së bashku. Në një tas përziejmë mustardën, uthullën, kripën, piperin e zi dhe pak vaj ulliri. E përziejmë mirë dhe marinojmë brokolin me specat.

E lëmë brokolin të ftohet dhe më pas shtojmë arrat dhe domatet e prera në gjysmë ose në katërsh, nëse janë të mëdha. Në fund shtojmë disa kubikë djathi dhe e shërbejmë menjëherë.