Sajuan atentatin në Novoselë për të marrë azil, arrestohen dy shokët

Policia ka arritur të zbardhë atentatin e ndodhur në Novoselë më 12 maj 2019, ku persona të paidentifikuar hapën zjarr mbi 24 vjeçarin Romarjo Alliaj.

 

Sipas policisë atentati ishte i sajuar nga 24 vjeçari, Alliaj së bashku me shokun e tij për arsye personale. Për këtë fakt policia ka vënë në pranga shtetasit: Romarjo Alliaj, 24 vjeç dhe A.V., 51 vjeç të dy banues në Vlorë.

 

24 vjeçari akuzohet nga policia për veprat penale “Kallëzimi i rremë”, “Veprime që pengojnë zbulimin e së vërtetës”, “Largimi i të burgosurit nga vendi i vuajtjes së dënimit” si dhe “Mbajtje pa leje të armëve dhe municioneve”.

Ndërsa 51 vjeçari për “Kallëzimi i rremë” dhe “Mbajtje pa leje të armëve luftarake dhe municioneve”.

 

Njoftimi policies:

 

Në vijim të veprimeve për zbardhjen e ngjarjes së ndodhur më datë 12.05.2019, ku persona të paidentifikuar kanë tentuar të vrasin 24 vjeçarin R. A, i cili në momentin e sulmit ishte duke drejtuar automjetin e tij Volkswagen Golf në autostradën Vlorë-Levan, Policia në bashkëpunim me Prokurorinë ka zbardhur ngjarjen, ku ka rezultuar se ngjarja është sajuar nga autori dhe shoku i tij , për interesa personale.

Në këtë kuadër u bë kapja dhe ndalimi i shtetasve:

1. A., 24 vjeç, banues në Vlorë, për veprat penale “Kallëzimi i rremë”, “Veprime që pengojnë zbulimin e së vërtetës”, “Largimi i të burgosurit nga vendi i vuajtjes së dënimit” dhe “Mbajtje pa leje të armëve dhe municioneve”.
2. V., 51 vjeç, banues në Vlorë, për veprat penale “Kallëzimi i rremë” dhe “Mbajtje pa leje të armëve luftarake dhe municioneve”.

Nga hetimet e kryera dhe provat e administruara ka rezultuar se shtetasi A.V në bashkëpunim me vetë shtetasin R.A, kanë përgatitur, simuluar dhe realizuar vetë ngjarjen në fjalë për interesa personale duke përdorur gjithashtu edhe një armë zjarri automatike.

Gjithashtu, për shtetasin R.A, më datë 01.06.2019, Gjykata ka vendosur masën e sigurisë “Arrest në shtëpi”, për veprën penale “Drejtimi i automjetit në mënyrë të parregullt”, por ditën e djeshme (03.06.2019) është konstatuar nëpër qytet duke mos zbatuar detyrimet ligjore në lidhje me masën e sigurisë.