Kur i kanë mbetur edhe 8 muaj nga shlyerja e dënimit, ish- ministri i Brendshëm, Saimir Tahiri rikthehet në dyert e Prokurorisë Antikorrupsion. Edhe pse drejtësia vendosi që ta lirojë para kohe ish-ministrin nga qelia ku po vuante dënimin e dhënë nga Apeli i Posaçëm, qershorin e kaluar, kjo nuk është bërë pengesë që SPAK të çelë hetim pasuror ndaj tij.
Hetimet po kryhen nga prokurori Elvin Gokaj, për dy vepra penale. Një prej tyre është ajo e falsifikimit të vulave, stampave apo formularit të vetëdeklarimi që parashikon një dënim nga tre deri në shtatë vjet heqje lirie.
Lexo edhe :
Akuza tjetër, ajo e fshehjes së të ardhurave, parashikon një dënim nga katër deri në tetë vjet burg. Nëse dyshimet e prokurorit provohen, atëherë ish- ministri i brendshëm do ta provojë bankën e të akuzuarit për të dytën herë.
Saimir Tahiri u dënua me vendim të gjyqtarit të apelit të posaçëm, Engert Pëllumbi, shkurtin e 2022 në një seancë maratonë për shpërdorim detyre me pesë vjet burg, dënim ky që u konvertua në tre vjet e katër muaj me gjykim të shkurtuar.
Por për ish-ministrin koha e vuajtjes së dënimit do të ishte shumë e shkurtër, vetëm 16 muaj, pas një kërkesë për liri të bërë prej tij me argumentin se bashkëshortja e tij e kishte të pamundur të kujdesej për dy fëmijët e tyre për shkak të problemeve shëndetësore.
Tahiri iu shpëtoi akuzave për të cilat u hetua nga prokuroria, nga “Korrupsioni i zyrtarëve të lartë”, “Trafiku i lëndëve narkotike kryer në bashkëpunim” dhe “Pjesëmarrje në grup të strukturuar kriminal”, duke u dënuar vetëm për shpërdorim detyre.
Ish-ministri socialist, u vu nën hetim në vitin 2017, nën dyshimet se kishte lidhje me një grup kriminal të drejtuar nga vëllezërit Habilaj, me të cilët ai ka lidhje farefisnore. Ata janë të akuzuar për trafik lëndësh narkotike dhe ky grup u hetua edhe në Itali./vizionplus.tv
