Rreth 111 milionë qytetarë rusë me të drejtë vote, zgjedhin sot presidentin e vendit. Qendrat e votimit do të qëndrojnë të hapura për 22 orë.
Votat e para janë hedhur në rajonet Kamçatka dhe Chukotka në orën 20:00 të ditës së shtunë, ndërsa në
Moskë, votimi filloi nëntë orë më vonë.
Në këto zgjedhje pritet që presidenti aktual Vladimir Putin të fitojë mandatin e katërt.
Ai gjendet përballë 7 kandidatëve të tjerë, por rivali i vetëm i madh i Putinit është lideri opozitar dhe aktivisti kundër korrupsionit Aleksei Navalny.
Ai nuk është lejuar të marrë pjesë në zgjedhje, pasi më parë ishte dënuar për abuzim duke u bërë iniciator i protestave mbarëpopullore.
Navalny u ka bërë thirrje rusëve që të bojkotojnë zgjedhjet.
Ndërkohë që 1/3 e votuesve kanë zgjedhur rrugën elektronike, janë raportuar edhe disa probleme.
Komisioni Qendror i Zgjedhjeve ka pësuar një sulm kibernetik i cili ka zgjatur për rreth 3 orë dhe origjina e tij është identifikuar nga 15 vende të ndryshme.
Sulmi synonte të prekte qendrën e informacionit.
Sipas Qendrës për Studime të Opinionit Publik, organizatë e afërt me Kremlinin, Putini sipas sondazheve, do të fitojë 69 për qind të mbështetjes së rusëve.
Sipas një sondazhi të bërë nga Gallup më 2017, 80 për qind e rusëve miratojnë udhëheqjen e Putinit, ndërkaq 40 për qind u besojnë zgjedhjeve në Rusi.
Për zgjedhjet presidenciale, Policia në Moskë ka njoftuar se ka angazhuar 17 mijë oficerë, trupa të Gardës Kombëtare dhe personel tjetër të sigurisë.
Në orën 18:00 do të mbyllen qendrat e votimit ndërsa nesër priten rezultatet e para zyrtare.
