Rusia ndaloi këtë të mërkurë dërgesat e gazit në Evropë përmes gazsjellësit Nord Stream 1. Gazprom mbylli tubacionin për në Gjermani dhe rrjedhimisht për të gjithë Europën. Sipas kompanisë ndërprerja e furnizimeve me gaz është bërë për shkak të mirëmbajtjes që pritet të zgjasë deri më 3 shtator.
Gazprom sqaron se njësia e vetme e pompimit që funksionon do të mbyllet për tre ditë për mirëmbajtje dhe në përputhje me kontratën punimet do të kryhen nga ekspertët e kompanisë së bashku me kolegët e Siemens.
Por ky njoftim ka sjell reagimin e Gjermanisë. Shefi i Agjencisë federale të Rrjetit në Gjermani, Klaus Mueller, tha se vendimi është teknikisht i pakuptueshëm. Ai paralajmëroi se kjo ndalesë e gazit ka të ngjarë të jetë thjesht një pretekst nga Moska për të përdorur furnizimet me energji si kërcënim.
Qeveritë evropiane kanë frikë se Moska mund ta zgjasë këtë pezullim për t’iu kundërpërgjigjur sanksioneve që u vendosën ndaj Rusisë pas pushtimit të Ukrainës.
Ata akuzojnë presidentin Putin për përdorimin e rezervave të energjisë si një armë lufte, ndërsa Moska mohon pretendime të tilla. Ndërprerja e furnizimit ka rritur çmimet e gazit dhe e kanë zhytur bllokun në pasiguri energjetike.
