Rusia ka nisur sot procesin e votimit për zgjedhjet presidenciale, që do të zgjasin tre ditë.
Në këto zgjedhje, të parat që prej nisjes së luftës në Ukrainë, janë në garë katër politikanë, por nuk ka asnjë dilemë që Vladimir Putin do të fitojë sërish.
Lexo edhe :
Related Posts
Putin pritet ta zgjasë sundimin e tij për edhe gjashtë vjet të tjera, pasi asnjë nga kundërshtarët e tij seriozë nuk u lejua të garojë.
Dy kandidatët kundër luftës, Boris Nadezhdin dhe Yekaterina Duntsova u ndaluan nga komisioni zgjedhor, ndërsa të tjerët ose janë vrarë ose janë dërguar në burg apo jashtë vendit.
Më i fundit ishte Aleksei Navalny që ndërroi jetë më pak se një muaj më parë në rrethana të dyshimta në një burg në Siberi.
Qendrat e para të votimit ndërkohë u hapën në Lindjen e Largët të Rusisë.
Gjatë ditës, votuesit do t’i hedhin votat e tyre në rreth 100.000 qendra në 11 zona kohore të vendit, si dhe në rajonet e Ukrainës të cilat Moska i aneksoi pas pushtimit rreth dy vite më parë. Janë rreth 110 milionë rusë me të drejtë vote në të gjithë territorin dhe rreth 6 milionë në katër rajonet ukrainase.
Kievi zyrtar dhe qeveritë perëndimore e kanë dënuar Rusinë për mbajtjen e zgjedhjeve në rajonet ukrainase, duke i cilësuar ato si të jashtëligjshme.
Rezultati i zgjedhjeve pritet të bëhet i ditur më 18 mars. Vladimir Putin ka qenë në pushtet si kryeministër ose president që prej vitit 1999 dhe pritet të qëndrojë të paktën deri në 2030. /vizionplus.tv
