Policia Rrugore e Korçës ka intensifikuar monitorimin në të gjitha akset rrugore të qarkut, duke përdorur pajisje inteligjente me synim parandalimin e aksidenteve dhe menaxhimin e trafikut.
Gjatë një jave monitorimi, janë proceduar penalisht 3 drejtues mjetesh për veprat penale “Drejtimi i mjeteve në mënyrë të parregullt” dhe “Shkelja e rregullave të qarkullimit rrugor”.
Në të njëjtën periudhë, janë vendosur 759 masa administrative për shkelje të ndryshme të Kodit Rrugor.
127 masa janë vendosur për parakalime të gabuara, 274 për ndalim të gabuar të mjetit, 32 për mosvendosje të kaskës mbrojtëse dhe 3 për drejtim të mjetit nën efektin e alkoolit.
Gjithashtu, janë vendosur 27 masa për mosvendosje të rripit të sigurimit, 42 për mosrespektim të këmbësorëve në vijat e bardha, 4 për përdorim të celularit gjatë drejtimit të mjetit dhe 2 për xhama të errësuar. 248 masa të tjera lidhen me shkelje të ndryshme të Kodit Rrugor.
Kontrollet e Policisë Rrugore do të vijojnë në të gjitha akset urbane, interurbane dhe rurale të qarkut të Korçës, me qëllim parandalimin e aksidenteve dhe rritjen e sigurisë rrugore.
Policia u bën apel drejtuesve të mjeteve të respektojnë me rigorozitet rregullat e qarkullimit.
/vizionplus.tv
