Kërkesa e deputetit Erald Kapri për zhvillimin e një interpelance me ministrin e Brendshëm, Besfort Lamallari, lidhur me protestat e Rrjollit dhe Zvërnecit, u rrëzua në seancën plenare të ditës së sotme.
Kryetari i Kuvendit, Niko Peleshi, argumentoi se temat e ngritura kanë qenë pjesë e rendit të ditës në seancat e mëparshme dhe janë diskutuar tashmë me ministrin Lamallari, ndaj nuk përbëjnë më objekt për një interpelancë të re.
Vendimi u kundërshtua nga Kapri, i cili e cilësoi refuzimin si një akt censurë ndaj opozitës. Deputeti akuzoi ministrin e Brendshëm për mosveprim ndaj problematikave në Policinë e Shtetit dhe ngriti shqetësime për ngjarjet në Zvërnec dhe Rrjoll.
“Si mund të ndaloni një deputet të flasë për një çështje që është miratuar? Nuk është parlament ky. Nuk mund të na ndaloni të pyesim ministrin e Brendshëm vetëm sepse tema është trajtuar në një seancë të kaluar. Ministri merret me sulmin ndaj protestuesve, ndërsa nuk merret me Policinë e Shtetit që ka dalë nga shinat,” deklaroi Kapri nga foltorja.
Ai u ndal edhe te incidentet në Zvërnec, duke pretenduar se kompanitë private të sigurisë që ushtruan dhunë kanë vijuar aktivitetin nën emra të rinj, pavarësisht deklaratave se u ishin hequr licencat. Sipas tij, opozitës po i mohohet e drejta për të kërkuar llogari mbi këto çështje.
