Rrjedhja e gazit nga bombola alarmon banorët e një pallati në Fier, zjarrfikësit shmangin shpërthimin

Një rrjedhje gazi nga një bombul gatimi ka alarmuar banorët e një pallati në lagjen “15 Tetori” në Fier, duke kërkuar ndërhyrjen e shërbimit zjarrfikës.

Ngjarja është regjistruar në apartamentin ku banonte një çift të moshuarish. Pas konstatimit të rrjedhjes së gazit dhe rrezikut që paraqiste situata, banorët kanë njoftuar menjëherë zjarrfikësit.

Shërbimi zjarrfikës ka mbërritur në vendngjarje dhe ka ndërhyrë për largimin e bombulës së gazit nga banesa, ndërsa të moshuarit janë nxjerrë nga apartamenti për arsye sigurie.

Ndërhyrja e shpejtë e zjarrfikësve ka parandaluar përkeqësimin e situatës dhe një rrezik të mundshëm për jetën e banorëve.

Nga ngjarja nuk raportohen pasoja, ndërsa rasti rikthen vëmendjen te rëndësia e kontrollit të bombulave të gazit dhe reagimit të menjëhershëm në rast rrjedhjeje.